ഫാ. മാത്യു ഓണയാത്തൻകുഴി നിര്യാതനായി

*

ഫാ. മാത്യു ഓണയാത്തൻകുഴി (92) നിര്യാതനായി*

താമരശ്ശേരി : താമരശ്ശേരി രൂപതാംഗം ഫാ. മാത്യു ഓണയാത്താൻകുഴി (92) നിര്യാതനായി. കോഴിക്കോട് ഗുഡ്ഷെപ്പേർഡ് വൈദിക വിശ്രമ മന്ദിരത്തിൽ വിശ്രമജീവിതം നയിച്ചു വരികയായിരുന്നു.

1932 ഒക്ടോബർ 17ന് കാഞ്ഞിരപ്പള്ളി രൂപതയിലെ പഴയിടം ഇടവകയിൽ ജനിച്ചു. പരേതരായ വർഗ്ഗീസ് - ഏലി ദമ്പതികളുടെ ഏഴ് മക്കളിൽ നാലാമനായി ജനിച്ചു. പഴയിടം എൽ.പി., യൂ.പി. ചേനപ്പാടി യു.പി. സ്കൂൾ, ചിറക്കടവ് ഹൈസ്ക്കൂൾ എന്നിവിടങ്ങളിൽ സ്കൂൾ വിദ്യാഭ്യാസം പൂർത്തിയാക്കിയ ശേഷം പാലാ രൂപതയുടെ കുമ്മണ്ണൂരുള്ള മൈനർ സെമിനാരിയിൽ പൗരോഹിത്യ പരിശീലനം  ആരംഭിച്ചു. തുടർന്ന് ആലുവ സെന്റ് ജോസഫ്സ് പൊന്തിഫിക്കൽ മേജർ സെമിനാരിയിൽ തത്വശാസ്ത്ര, ദൈവശാസ്ത്ര പഠനങ്ങൾക്കായി അയക്കപ്പെട്ടു. വൈദിക പരിശീലനത്തിനൊടുവിൽ പഴയിടം സെന്റ് മൈക്കിൾസ് ഇടവക ദൈവാലയത്തിൽ വെച്ച് 1964 മാർച്ച് 13ന് തലശ്ശേരി രൂപതയുടെ പ്രഥമ മെത്രാൻ അഭിവന്ദ്യ സെബാസ്റ്റ്യൻ വള്ളോപ്പിള്ളി പിതാവിൽ നിന്ന് വൈദികപട്ടം സ്വീകരിക്കുകയും മാർച്ച് 14ന് പഴയിടം സെന്റ് മൈക്കിൾസ് ഇടവക ദൈവാലയത്തിൽവെച്ച് പ്രഥമ ദിവ്യബലിയർപ്പിക്കുകയും ചെയ്തു. 

1964ൽ അഭിഭക്ത തലശ്ശേരി അതിരൂപതയിലെ കുളത്തുവയൽ ഇടവകയിൽ അസിസ്റ്റന്റ് വികാരിയായി അജപാലന ദൗത്യം ആരംഭിച്ചു. തുടർന്ന് പെരുവണ്ണാമൂഴി, പൈസക്കരി, ചെറുപുഴ, നെല്ലിക്കാംപൊയിൽ, വിമലശ്ശേരി, വെള്ളരിക്കുണ്ട്, പന്തല്ലൂർ, കാളികാവ് - അടയ്ക്കാക്കുണ്ട്, ഈരൂട്, തേക്കുംകുറ്റി, പശുക്കടവ്, വിളക്കാംതോട്, കാറ്റുള്ളമല, കക്കയം, കട്ടിപ്പാറ എന്നീ ഇടവകകളിൽ വികാരിയായും സേവനമനുഷ്ഠിച്ചിട്ടുണ്ട്. 2012ൽ ഔദ്യോഗിക അജപാലന ജീവിതത്തിൽ നിന്ന് വിരമിച്ച്, കോഴിക്കോട് മേരിക്കുന്നിലുള്ള ഗുഡ് ഷെപ്പേർഡ് പ്രീസ്റ്റ് ഹോമിൽ വിശ്രമജീവിതത്തിലേക്ക് പ്രവേശിച്ചു. 

ആരോഗ്യപരമായ അസ്വസ്ഥതകൾ വർദ്ധിച്ചപ്പോൾ പലതവണ ഹോസ്പിറ്റലിൽ പ്രവേശിപ്പിക്കപ്പെട്ട മാത്യു അച്ചനെ അവസാനമായി ജൂലൈ 25ന് കോഴിക്കോട്, മേരിക്കുന്ന് നിർമ്മല ഹോസ്പിറ്റലിൽ പ്രവേശിപ്പിക്കുകയും 29.07.2024ന് ഉച്ചകഴിഞ്ഞ് 02.10 മണിക്ക് അന്ത്യകൂദാശകളെല്ലാം സ്വീകരിച്ച് കർത്താവിൽ നിദ്ര പ്രാപിക്കുകയും ചെയ്തു.

(Late) ഒ.ജെ. ജോസഫ് (കറിക്കാട്ടൂർ), (Late) ഫാ. സഖറിയാസ് ഓണയാത്തൻകുഴി MSFS, (Late) ദേവസ്യാച്ചൻ (പഴയിടം), ഒ.വി. തോമസ് (പഴയിടം), (Late) ഫാ. വർഗീസ് OJ (ചങ്ങനാശ്ശേരി രൂപത), (Late) ഏലിക്കുട്ടി കുന്നത്ത് (കൂവപ്പള്ളി) എന്നിവർ സഹോദരങ്ങളാണ്.

പ്രിയപ്പെട്ട മാത്യു ഓണയാത്തൻകുഴി അച്ചന്റെ ഭൗതിക ദേഹം അന്തിമോപചാരങ്ങൾക്കായി ഇന്ന്  തിങ്കളാഴ്ച, (29.07.2024) വൈകുന്നേരം 04.30 മണി മുതൽ നാളെ ചൊവ്വാഴ്ച (30.07.2024) രാവിലെ 11.00 മണി വരെ, കോഴിക്കോട്, പി.എം.ഒ.സി.യിൽ പൊതുദർശനത്തിന് വെക്കുന്നതാണ്. മൃതസംസ്കാര ശുശ്രൂഷകൾ ബുധനാഴ്ച (31.07.2024) രാവിലെ 09.30 മണിക്ക് പഴയിടത്തുള്ള ശ്രീ. ചെറിയാൻ ഒാണായത്തൻകുഴിയുടെ ഭവനത്തിൽ ആരംഭിക്കുന്നതും, രാവിലെ 10.00 മണിക്ക് കാഞ്ഞിരപ്പള്ളി രൂപതയിലെ പഴയിടം സെന്റ് മൈക്കിൾസ് പള്ളിയിൽ വി. കുർബ്ബാനയോടെ നടത്തുന്ന ശുശ്രൂഷകൾക്ക് ശേഷം പഴയിടം പള്ളി സെമിത്തേരിയിൽ, താമരശ്ശേരി രൂപതാദ്ധ്യക്ഷൻ അഭിവന്ദ്യ മാർ റെമീജിയോസ് ഇഞ്ചനാനിയിൽ പിതാവിന്റെ മുഖ്യ കാർമ്മികത്വത്തിൽ നടത്തുന്നതുമാണ്.

കുടിയേറ്റത്തിന്റെ ആദ്യനാളുകളിൽ അസൗകര്യങ്ങൾ മാത്രം കൈമുതലുണ്ടായിരുന്ന ഇടവകകളിൽ തന്റെ  ശക്തമായ നേതൃത്വവും കഠിനാദ്ധ്വാനവും കൊണ്ട് ഇടവകജനത്തെ മുന്നോട്ട് നയിച്ച അജപാലകനായിരുന്നു ബഹു. മാത്യു ഓണയാത്തൻകുഴി അച്ചൻ.